मेरा गौं की मिकै खबर मिली गै
रचनाकार: राजू पाण्डेय
वीडियो कॉल मे तस्वीर देखी गै
मेरा गौं की मिकै खबर मिली गै।।
सीढ़ी दार गड़ा भिंडा, उच्चा उच्चा रुख
देखी मि भूलि गयुं, बॉर्डरै का दुख
सरु और सरु की ईजा देखी गै
वीडियो कॉल मे तस्वीर देखी गै
मेरा गौं की मिकै खबर मिली गै।।
पाथरे कुडी हामरी, पाखा सुकया गौत
बॉर्डर याद उछि, मिकै गौं कि भौत
घौम तापनि ईजा आमा देखी गै
वीडियो कॉल मे तस्वीर देखी गै
मेरा गौं की मिकै खबर मिली गै।।
उच्चा उच्चा डांडा काना, सेतो हिमाल
कसीकै काटिलो, माया को यो जाल
झूली फूली नारंगे डाली देखी गै
वीडियो कॉल मे तस्वीर देखी गै
मेरा गौं की मिकै खबर मिली गै।।
कैकि खुशखबरी छ, कैको लग्न काज
"राजू" खबर मिली, कॉल करि आज
नयी हय्यै गोरु कि बाछि देखी गै
वीडियो कॉल मे तस्वीर देखी गै
मेरा गौं की मिकै खबर मिली गै।।
-----------------------------------
~राजू पाण्डेय, 21-07-2020
=============================
बगोटी (चंपावत - उत्तराखंड)
यमुनाविहार (दिल्ली)
bagoti.raju@gmail.com
Copyright © 2019. All Rights Reserved
फोटो सोर्स: गूगल
0 टिप्पणियाँ