'घ्यु त्यार', ओल्गिया, सिंह संक्रांति'
"उत्तराखंडौक लोक पर्व"
लेखिका: अरुण प्रभा पंत
हर म्हैण एक गते हिंदी म्हैणाक दिन, संग्रांत हुनेर है,यो संग्रांत अंग्रेजी १३ तारीख बै १७ तारीख में जदिन सूर्य राशि परिवर्तन करुं संग्रांत पड़नेर भै। आजैक स़ग्रांत कं 'सिंह संग्रांत' कुनी किलैकि आजा दिन सूर्य कर्क राशि बटिक सिंह (पंचम राशि)राशि में प्रवेष करुं।जो आजाक दिन बटिक अधिल संग्रांतहै पैल्लि पैद हुं वीक जंमपत्र में सूर्य पांचाक अंक में हुनेर भौय। आज दान पुण्य लै करनी ,चेलि बेटीन और सामान कं गरीब बेसहारा न लोगन कं साग पात घ्यु दूद,दै दान करणौक लै प्रावधान छु।
यो त्यार लै हमार और त्याराक न्यांथ पैल्लियें बै मनायी जांछीपर आब फेसबुक और व्हाटसअपाक करण अधिक प्रसिद्धी प्राप्त कर चुक गो।आब तौ प्रदेश सरकाराक और स्थानीय विधायक और सांसद नाक तरफ बै जाग जाग घ्यु त्याराक बोर्ड लागि दिखीनी। वास्तव में तौ लै फसलौक, गोर बाछनौक त्यार भौय। हमार मुख्य कृषि कारोबारैल जुड़ी हुणा कारण एक लोकपर्व लै भौय।
यो चौमास में खूब हरि घा मिलणांक कारण हमौर गोवंश खूब दूद दिनेर वाल हुनेर भौय अतः यो त्यार में विशेष कर आजाक दिन घ्यु खाणैक परंपरा भै। हमार यां घ्यु त्यार में गाबौक(घुइयां की मुड़ीपत्तियां)मुल मिलैयी साग घुइयांक दै हालि साग और मांषाक बेड़ु र्वाट घ्युमें तरबरान कर बेर खाणौक चलन छु,भौत जाग नान भौ नाक(बच्चे)खुटाक तावन लै घ्यु चुपोड़नी।
मान्यता छु कि जो आजाक दिन घ्यु नि खान उ अघिल जन्म में गनेलैक (घौंघा) ज्यून जां। जेलै छु पै सब जणि घ्यु खान हैयी चैनी,स्वस्थ्य रैयी चैनी। म्यार तरफ बै सबन कं घ्यु त्यार और लै सबै त्यार पैट (शुभ) हैयी चैनी।शुभ संग्रांत।
मौलिक
अरुण प्रभा पंत, 16-08-2020
अगर आप कुमाउँनी भाषा के प्रेमी हैं तो अरुण प्रभा पंत के यु-ट्यूब चैनल को सब्सक्राईब करें
0 टिप्पणियाँ