"कसिक"
कुमाऊँनी भाषा में ग़ज़ल
रचनाकार: मोहन चन्द्र जोशी
🌹🌹🌹🌹🌹🌹
आँखरों में सारी बात कौंनू कसिक।
मि सारै दिन सारी रात रौंनूँ कसिक।।
तेरी माया का फेरों पराँण रिटौं।
य सुरों कैं अघिल कैं बट्यौंनूँ कसिक।।
फाँम का ग्वैर छ्न यौं आँखों का अघिल।
नीन गैरी पट्याई सितौंनूँ कसिक।।
बिना धुँ बिनैं राप छु विरह की निगुर।
आग हि सिलकनीं क निमौंनूँ कसिक।।
जुग जुगों बटि लगन य अमर प्रीत की।
तेरी-मेरी कहानी बतौंनूँ कसिक।।
भाग आपणै आपण संग आपणैं करम।
कैकैं दोष दिबेर दोछ्यौंनूँ कसिक।।
भाव छ्न गैर छलकन सुवा के बतौं।
य हिया का उमाव लुकौंनूँ कसिक।।
भौतै छन क्वीड़ मन में लुकी 'मोहना'।
तुहैं बिन कई दुःख घटौंनूँ कसिक।।
................................................................
मोहन जोशी, गरुड़, बागेश्वर। 03-11-2020
0 टिप्पणियाँ