पहाड़ी लड़के का लड़की को जबाबी पत्र
लेखक: राजेंद्र सिंह भंडारी
तुमर पत्र मिलौ, ख़ुशी है कि तुमकु लै फिकर छू कि भो दिन के हौल?
यौस बात नि छू कि म्यर बसक के न्हें.... म्यर बसक लै भौत कुछ छू.. आजकल आर्मी भर्ती मि पास हूंण ल के आसान बात न छू, बेरोजगारी इदु बढ़ गे.. एक बार मि द्वी-द्वी सौ लौंडो कु दौड़े दिनीं। कदू झंण तो पतेड़ी ल जानीं। तुम जे समंझछा समझो, लेकिन आपूण दौड़ मील हर बार पास कर रै। एक बार तो एक्ससिलेंट लै मार हे, लेकिन लास्ट तक कभतै कसिकै तो कभतै कसिकै भ्यार ह जानु। लेकिन यौ बार म्यर लास्ट चांस छू, फिर उम्र ज्यादा ह जैं। यै लिजी मील लै पूर जोर लगै रौ। रात्ति-ब्याव द्वी टैम दौड़ लगूनु..... जर्नल नॉलेज'क किताब और प्रतियोगिता दर्पण लै चाटि हेली।
------------------
तुम कुंछा चार साल पैली चार बकार धरि हुना तो आज तक चालीस है जांन, लेकिन बकार पालण मि मेहनत कदु छू? चाहे ह्युं पड़ो, या द्यो झड़ लागि रो बकरां दगै रोज जंगव जाण भै। इदु मेहनत करी बाद चाहे बकरी कदु लै पढ़ी लिखी छू, कदु ल डबल कमैं ल्यू, लेकिन क्वे लै आपूण च्येलि बकरी(ग्वाले) कुं नि दिंण चांन.. और म्यर सौर ज्यु तो पल्टणी(फौजी) छन। ऊ तुमुकु क्वे बकरी दगाड़ ब्यावे द्येला के?
--------------
दूसर बात य छू कि म्यर और तुमर लिजी फौज'क नोकरी हबे भल के नछु.. 15-20 सालक नोकरी बाद रिटायर ऐ सक्छा, पेंशन लै मिलैं। बाकि क्वे ल नोकरी मि आब पेंशन नछु... दूसौर कैंटीन बै समान लै सस्त मिल जां। जदु क्रीम-पौडर और फेरनलबली चपोड़छा उदू चपोड़ो, खतम हुणौक के झसक नां.. सेंट-वेंट ल सस्त मिल जां, जदु फुस्फुसाट करछा करो.. साल मि तीन-तीन म्हैणक छुट्टी और को जाग मिलनि बताओ धिं?
सबसे बड़ी बात कि देश सेवा मि जांन(प्राण) दिणक मौक मिलूं.. सब लोगों किस्मत मि नि हूंन कानि मि बंदूक लिबे सीमा मि ठाड़ हूंन...
क्वे झट्यालु बन्दूक जै के छू जो क्वे लै फैर कर दियो.. वीक लिजी लै सोबनि ज लौंड चैनी...😊
आपूण ध्यान धरिया और ताले आपूण ब्या लिजी घर मि मना करते रओ। यौ बार भर्ती हगोयौ तो तुमर घर आपु बौज्यु कुं सिद्द शगुनी ठ्यौक पकड़ै बेरि भेजूंन। ब्या तारीख फिक्स करुहूं..
चलो ठिक छू, पत्र मिललौ तो जबाब लेखिया..
तुमर शोबनि हुस्यार
0 टिप्पणियाँ