पहाड़न में आजि ले
लेखक: विनोद पन्त 'खन्तोली'
०१- कैकै घर जाणा लिजी कुन्ड नि खटकूण पडन, सीद भीतरै जै सकछा।
०२- आस पडौस या गौं में क्वे रमेश जी , दिनेश जी, सिंह साहब, फलानी मैडम, सर नि हुन। काकज्यू, आमा, बुबू , जेड्ज, जेठबौज्यू हुनन।
०३- आजि ले बैठणा लिजी.. बोरी लाओ या इत्ती भीड मेंं बैठो ज्यादा आत्मीयता लागौं।
०४- चाहा आजि ले गिलासै में मिलौं.. ज्यादा नजदीकी में कटक मिलैं.. चीनी'क चाहा लि पण्यैन लागै कूनी।
०५- चाहा पीछै नि पुछि जान, सीद चाहा बणबेर पुजि जां, दूध नि होल तो फिक चहा तबले लि आल।
०६- कैकी यां धिनालि छ तो छां पाणि डायरैक्ट मागि सकछा... भौजी छां दिओ..।
०७- काकड़, आडू, पुलम या कोई ले फल क्वे ले एकलै नि खान.. सबन बाटी जां।
०८- आलू'क गुडुक आजि ले बणनै छन.. और पैलिया चारी चाव लि खायी जानी
०९- क्वे ले अनाज या नई फल ईष्ट कें चढाई जां या वीक लिजी धरी जां।
१०- कति बटी मिठाई आली तो पैली एक टिकुड़ द्याप्ताक थान में धरी जां।
११- कैके यां क्वे नक भलि चीज आलि, तो पुर मुहल्ल में बाटी जां।
१२- क्वे परदेश बटी घर आई छ या चेलि बेटि मैत बटी आली तो उनार दगाड भेट करणा लिजी बुजुर्ग खुद पुज जानी.. यांक जस जी के भै .. वो तो मिलने भी नही आता, बडा आदमी बन गया।
१३- सुवाल पथाई न्यूत दिणक रिवाज, पिठ्या क थालि लिबेर चेली बेटी लगूण तो सबसे अलग .. और कैं नि हुन यो परम्परा।
१४- भिटौली क परम्परा... आजि ले छ।
१५ - मैत बटी जाण बखत देलि पुजण आजि ले छ और हमेशा रौल।
१६- क्वे ले काम काज हैबेर पैली, कति भ्यैर जाण पर, हर दुख सुख में ईष्ट क उचैण आजि ले धरी जां।
१७- काकण काटण पर - फव काकडी फव, आजि ले कूनन।
१८- ईजा तू भल हैरौछै कैबेर आजि ले कोई आम तुमर खोर जरूर मलासैं।
१९- चाहे उमर पचास साल कदुकै हो, घर गे तो गौं क आम बुबू हमरि तारीफ में एक चीज जरूर कूनन - यो तो भलो नानतिन भोय।
२०- जब क्वे परदेश जाण लागि रौल या चेलि सौरास जालि तो सब जाणि आपुण आगण बटी या भीड बटी तब तक चै रौल जब तक उ आखन बटी ओझल नि हो, या वीक गाडि कें तब तक चानी जब तक उ देखीन लागैं..
२१- क्वे ले पौण बाल मिठाई जरूर लिबेर उं।
(और क्वे यसि चीज तुम ले बताया)
विनोद पन्त' खन्तोली ' (हरिद्वार), 28-05-2021
M-9411371839
फोटो सोर्स: गूगल
0 टिप्पणियाँ