-:मेरो सपण:-
रचनाकार: हिमानी
यो जिंदगि मेरि
छंद-अलंकारलि सजीं कोई
कविता हुंणि त
मी वीकै गाई ल्हिंणु
हारमोनी क् दगड़
मी वीकै गाई ल्हिंणु
तबल क् दगड़
मी वीकै सुणिं ल्हिंणु
बंशी क् धुण में
यो जिंदगि मेरि
ठंड चन्द्रमा जसि हुंणि त
मी वीकै देख्या रूणी
बैठि बेर तार न क् तलि
यो जिंदगि मेरि
समुंदर जसि हुणि त
मी गिण ल्हिणुं वीकै
तली-मलि करण
लहरन क् दगड़
यो जिंदगि मेरि
फूलन जसि फूंलणि त
मी चढ़ूंनूं वीकै
पिया क् खुटण में
यो जिंदगि मेरि
चैत क् मैण जसि हुंणि त
मी माठु-माठु हाव बणि
बहण्यूं कुणि-कुणि में
यो जिंदगि मेरि
सुकूण हुंणि त
मी बसि जांनूं सबनकै
बैचेन जिगार में
यो गर कोई पंछी हुंणि त
मी उड़ि ऊंनू
अनंत अगास में
यो जिंदगि मेरि
कसै भजन जसि हुणिं त
कतुक भल हुणिं
मी गानूं वीकै रोज
द्याप्ता न क् थाण में
पर अफसोस यो छु कि
यो जिंदगि एक सपण जसि छु
देखनूं जैके मी
खुल्लि आँखून ले.
--हिमानी ©, 30-07-2020
-सर्वाधिकार सुरक्षित
फोटो सोर्स: गूगल
0 टिप्पणियाँ