जिम कार्बेट पार्काक् शेर......

जिम कार्बेट पार्काक् शेर......

रचनाकार: ज्ञान पंत

मैंसा खिलाफ
मैंस ठा्ड़ है रौ
बँण्याठ ल्ही बेरि
पौयूँण लागि रौ......
डाँसि ठुँङन
पाँणि पिवै-पिवे बेरि
पत्त नै
कि करणैक
सोचण लागि रौ भुला......
हमा्र लोकतंत्र में
आ्ब चुनाव
यसी कै हुँण लागि रौ।
.........................................
मनखिनैं लिज
मनखिनां हिसाबैलि
मनखिनैं'कि सरकार में
"मैस्योव" छाड़ि दियौ त
बौ जितै.......
और के कमीं नि भै हो!
............................................
आज तु नेता
भोल मैं....
आज तु खालै
भोल मैं खूँन
यसी कै पहाड़
ढुँङ में धरुँन.....
---------------------------------
बखत पर
घाम नि आयै त
के फैद....
बुशी धानन् में
कतुकै पाँणि लगाऔ....
पिंगौव तिना्ड़
हरीं नि हुनेर भै....
........................
बखत पर
बहौड़
हव् नि लगायो त
फिर घर-बँण
कैं को ले
नि रुनेर भै.....
........................
जिन्दगी 'की न्याँत
बखत पर
खेत नि समायि त
फिर बंजर खेतन में
लाख हव् बाऔ
डेल फोड़ौ
मै लगाऔ
के नि हुनेर भै.....
........................
खाल्ली
घा-पातनैलि
के होल् कै हरौछा
असल जिन्दगी में......
ग्यूँ-धान' न है बाहिक
फल - फूल ले की
चैनेर भै।

शब्दार्थ:- 

बँण्याठ - लम्बे हत्थे वाला औजार, 

डाँसि ढुँङन - (बेअसर) नदी के पत्थर,  

पौयूँण  - धार करना, 

मैस्योव - मानवता,  

ढुँङ में धरुँन - खोखला करेंगे

बुशी धान - खराब धान की पौध,  

पिंगौव तिनाड़ - पीली पड़ गई पौध,  

बहौड़ - बछड़ा,  

हव् बाऔ - हल चलाओ, 

डेल फोड़ौ - खेतों में मिट्टी के ढेले फोड़ना,

मै - लकड़ी के दाँत बना हल, 

बाहिक - अतिरिक्त/अलावा,  

चैनेर -  चाहिए

...... ज्ञान पंत, May 28, June 3, 2018

ज्ञान पंत जी द्वारा फ़ेसबुक ग्रुप कुमाऊँनी से साभार

ज्ञान पंत जी के फ़ेसबुक प्रोफ़ाईल पर जा सकते हैं