यार, तुझसे महोब्बत हो गई - वरिष्ठ साहित्यकार श्री देवकीनंदन कांडपाल ज्यू

"यार, तुझसे महोब्बत हो गई" वरिष्ठ साहित्यकार श्री देवकीनंदन कांडपाल ज्यू

कुमाउनी इंटरव्यू ©हमार कुमाउनी रचनाकार【17】

प्रस्तुति: राजेन्द्र ढैला

मित्र, जसकि मैंन एक सीरीज जसि शुरू कर राखै। जमें एक संक्षिप्त परिचय करूंण लाग रयूँ आपूं सब लोगन् कें, हमार कुमाउनी रचनाकारों'क। जो आपणि लेखनील कुमाउनी बोलि-भाषा, साहित्य और संस्कृती'कि सेवा में जुटि रयी।

यै क्रम में, आज मैं संक्षिप्त परिचय ल्हीबेर ऐरयूँ हमार वरिष्ठ कुमाउनी रचनाकार श्री देवकीनंदन कांडपाल ज्यूक। इनर जन्म ग्राम-खान, डाकघर-मंगडोली (काकड़ीघाट) जिल्ल अल्माड़ में ईजा पार्वती देवी व बौज्यू श्री कुलोमणी कांडपाल ज्यू (जो कि एक शिक्षक छी) वाँ 2 जुलाई सन 1949 में भौ। इनरी शिक्षा गौं खान में हुणाक् बाद पछां ज्योलीकोट, राजकीय इंटर कॉलेज शेर मंगडोली, नैनीताल और फिर अल्माड़ में संपन्न भै। इनून हिंदी बटी एम ए करौ। उबाद यौ अध्यापक पद पर रयी जमें जादेतर समय राजकीय इंटर कॉलेज शीतलाखेत में व्यतीत भौ, और फिर जुलाई 2009 में गरूड़ाबांज इंटर कॉलेज बटी रिटायर हैबेरन आपण गौं रूनयी और साहित्य सृजन लै करनयी। हेमलता,सुमन, पियूष और कमलेश इनार चार नान्तिन छन। सब आपण-आपण रथ-ब्यथ में टांजी छन।

प्रस्तुत छन इनन् दगड़ी हैई बातचीताक कुछ अंश...

सवाल01◆ उं तीन मनखिनों नाम बताओ जनून आपूंके प्रभावित करो?

जवाब● १) म्यार बौज्यू स्वर्गीय श्री कुलोमणि कांडपाल, २) कवि श्री रामदत्त पंत रानीखेत, ३) स्वर्गीय श्री जीवन सिंह बिष्ट 'मेघा आ' फिल्मकार।

सवाल02◆ रचना धर्मिता कब बटिक और कशिक शुरू है आपूं हिंदी में लै लिखछा लेकिन कुमाउनी लिखनकि प्रेरणा का बटी मिलै?

जवाब● मैं प्राइमरी में पढ़छी। म्यार बौज्यू म्यार गुरू, अध्यापक और म्यार दोस्त रयी। रत्तै सूर्योदय, ब्याल कै ध्रुव तार, चंद्रमा जरूर देखूंछी। और जो लै फूल पत्त नई जनम ल्हिंछी उकें दिखै उमें भगवानै झउक देखंछी। प्रकृति दगै बुलाण सहज छी। हिमालय देखि गंग प्रेरक रै। सर्वश्री बालम सिंह जनौटी, डॉ.हयात रावत, डॉ.पोखरिया, श्याम सिंह कुटौला, जगदीश जोशी साथै मथुरादत्त मठपाल ज्यूल कुमाउनी रंगत और संगत दिबेर दुदबोलि'क बोल खोली।

सवाल03◆ आपुण लोकप्रिय व्यक्ति को छन? एक नाम बताओ।

जवाब● अटल बिहारी वाजपेयी जी छी और डॉ.हयात सिंह रावत जी छन।

सवाल04◆ आपुण हिंदी और कुमाउनी में प्रकाशित किताबों नाम बताओ?

जवाब● हिंदी - 'लवकुश रामाश्वमेघ' नाटक, 'सखी' हिंदी काव्य संग्रह।

कुमाउनी- 'फानी छाँ', 'सीताज्यूक वनवास' बांकी सामुहिक संकलनों में और पत्र-पत्रिकाओं में प्रकाशित छन रचना।

सवाल05◆ लेखन कार्य करते हुए आपूं कें के-के सम्मान मिलि रयी?

जवाब● उसिक तो ना्न-ना्न भौत सम्मान मिलि रयी। लेकिन विशेष छ कुमाउनी भाषा साहित्य एवं संस्कृति प्रसार समिति कसार देवी अल्माड़'क 'साहित्य सेवी सम्मान'।

सवाल06◆ आपूंल कुमाउनी साहित्याक को-को विधाओं में कलम चलै राखै और आपणि लिखणैकि मन पसंद विधा कि छ?

जवाब● कहाणि, नाटक, निबंध और काव्य में कलम चली। लेकिन मनपसंद विधा बात छ त उ 'निबंध' छ।

सवाल07◆ आपुण खास शौक के-के छन?

जवाब● सूत कातण (तकली), घिंगारू लांठी बणै बुड़-बाड़िन कें दिण, प्राथमिक चिकित्सा, नई पीढीक सार करण, लेखन और प्रकृति दर्शन।

सवाल08◆ आपुण जिंदगी'क एक यादगार किस्स बताओ जो सबन दगड़ी साझा करण चाँछा?

जवाब● इजकि फाम- मैं स्काउटिंग में एच डब्ल्यू बी रयूँ। एक शिविर भनोली में दस दिनौक चलि रौछी, मैं कोई काम में फिल्ड में छी, यतुकै मैं, छै में पढनी एक चेलि दौड़बेर म्यार पास ऐ और मैंहूं कौछ- सर हमरी टोली में जो कमला छ उ डाड़ मारनै। मैं दौड़बेर कमला ढीक गयूँ पुछौ-किलै रूणैछै? कैलै परेशान करौछ के? वील सक सकानै बता- 'इजकि याद ऊणैं, मैं घर जानूँ'। उकें सुणतेई मैंकें आपणि दिवंगत इजकि याद ऐगै और कमलाल मैंकें डाड़ मारन देखल्हे। उ चणीं गै। मैंन वीकि बात वीकि इज दगै मुबाईल में करै। उबाद उ खुशि हैगै।

सवाल09◆ आपण जिंदगी'क सबन हैं खुशीक एक मौक बताओ?

जवाब● बौज्यू'ल मरण बखत मैंधैं कौछ 'यार, तुझसे महोब्बत हो गई'।

सवाल10◆ क्वे यस काम जो आपूं समजंछा अगर यो है जांछियो त भौत भल हुंछी?

जवाब● उजड़ी पहाड़ाक् गांव-खेत आबाद हैजो त भौत भल हुंछी।

सवाल11◆ आपूं जबकि एक सेवानिवृत्त शिक्षक छा त आब आपणि दिनचर्या कसी बितैं के-के करछा आपूं?

जवाब● शिक्षक आंग में छ। आब कक्षा में गाड़ गध्यार,आड़ू-बेड़ू,घिंगारू छन। मौसम चौकीदार छू। ऊंन सूर्ज, सरकनी संज टौनिक छन। कदिनै भलीकै हिमाव हेरन राणिखेत जै ऊंनू। घरवाई भल समाव करि दींछ। उई भलि सलाह, सेवाकार छ। घर बटिक द्वी सौ कदम पर सड़क छ। सड़का'क ढीक यक दुकान (कौपि, किताब,टौफी,बिस्कुट वाई) छ। सात बटी इग्यार बाजी तक दुकान में मास्टर बणि भैरूंनू। मित्रों दगै बात हैजैं खुट तंगड़ी जानी। गौं में निवास छ।

सवाल12◆ वर्तमान में के रचनौछा और आपणि ऊंणी वालि क्वे रचना?

जवाब● अनुवाद करनयूं 'सुदामा चरित' और 'कविताई'क कुमाउनी में।

सवाल13◆ साहित्यकि परिभाषा आपण शब्दों में बताओ?

जवाब● जिंदगी'क संपुट छ साहित्य।

सवाल14◆ आपुण हिंदी और कुमाउनी'क प्रिय लेखक को-को छन एक-एक नाम बताओ?

जवाब● हिंदी में हजारी प्रसाद द्विवेदी और कुमाउनी में त्रिभुवन गिरी।

सवाल15◆ टीवी में आपूं के देखण भल मानछा?

जवाब● नृत्य (उड़िया,कुमाउनी), राष्ट्रीय परिचर्या, फिलम 'बागवान' जसि।

सवाल16◆ पहाड़ी खाणु में आपुण मनपसंद खाणु के छ?

जवाब● खिचड़ी, का्प, रायमेसी दाल-भात, टपकी, द्वी चम्मच घ्यूं जे बणि जो।

सवाल17◆ नवोदित लेखक व रचनाकारों हूँ आपूं कि कूंण चाँछा?

जवाब● कुमाउनी में सकर लिखो, पलायन रोकणा लिजी सरकार कें चेताव करो।

सवाल18◆ आपण जिंदगी'क मूल मंत्र कि छ?

जवाब● आपुण मन दर्पण साफ रूण चैं।

सवाल19◆ आपण पाठकों हूं के संदेश दिनहा?

जवाब● 'आपै गुरू-चेला'।

सवाल20◆ क्वे यसि बात जो मैंन पुछि न और आपूं सब लोगन दगड़ि साझा करण चाँछा?

जवाब● अनुभव लोगों दगड़ी साझा करनयूं कि आज क्वे छ्वट नि हुण चान। यौ लै एक छूतकि (संक्रामक) बिमारी फैलनै। जैक निदान छ साधारीकरण।

भौत-भौत धन्यवाद महोदय समय निकालण हूँ। भल लागौ आपूं दगै बातचीत करण में।

सप्रेम धन्यवाद भुला राजेंद्र

★प्रस्तुति राजेंद्र ढैला, काठगोदाम।

आपसे अनुरोध है कि कलाकार के रूप में ढैला जी की प्रतिभा को जानने के लिए

यू-ट्युब चैनल "GHUGUTI JAGAR RD" को सब्सक्राईब करें