"स्वैंणाँ द्यखँण हैगी"

"स्वैंणाँ द्यखँण हैगी"

रचनाकार: मोहन चन्द्र जोशी

🌹🌹🌹🌹🌹🌹

यू , द्यू, त्यू, झार, छल्लम

उ गुल्ली-डंडाक् खइँन।

उ पाथरक् अड्डू,

उ गंज्याड़ुकि गाड़ि,

उँ नानछिनाक् अमल,

उँ दगड़ियोकि दाँणि।

पाँच डबलाक् खेल उ घसुच्ची कि खइँन।

अर्याठि कर्याठि

बाट् घाटै ,ढुँङ-माँटाक् नानछिनांक् कुड़,

उ बर-ब्योलिक् बर्यात,उँ नानछिनाक् खेल।

उ रभड़क् गिनूँ ,उ कागजक् बौल,

सुट्ट- पन्नौंकि-गड्डी,

उँ नानछिना क् खैल।।

🌹🌹🌹🌹🌹🌹

उ घसोड़ी घुनाँ में,

टाल् हाली सुर्याव,

उ माँटाक्-गल्लैक,

उ च्यौंनिक राव,

उ माँटैल रङिल ख्वौर, धुस्यार बाव।

सब ल्हैगीं भड़ागा-चुलनि, उ खावक् पाणि,

उ कागजैकि-नाव ,

जाँणि काँ बगीं?

सब स्वैंणा द्यखण हैगीं।

सब स्वै़ंणां द्यखण हैगीं।।

🌹🌹🌹🌹🌹🌹

उँ रङिल झ्वाड़, वाल् बाखई-पाल् बाखई।

उ बड़बाज्युकि ह्वाक्,

उ आमैकि-चौथ्याइ,

उ आँण - काथाँ कि रात, उ बौड़ियौंकि रत्याइ।

उ काइ भैंसक् दूध,

उ झालि- गोरुक् घ्यु,

उँ आमाँक् काटी दुँणकाटाक्-पू,

कौस मैंसौंक् मन छी?

रड़ै दिछी भद्याइ।

बचलौ, मि फिर खौंल। लै पैली खा तू!

उस मैंस्योव!

जाँणि काँ बगी?

सब स्वैंणां द्यखण हैगीं। सब स्वैंणा द्यखण हैगीं।

🌹🌹🌹🌹🌹🌹

................................................................

मोहन जोशी, गरुड़, बागेश्वर। 28-04-2020

श्री मोहन चन्द्र जोशी जी की पोस्ट फेसबुक वॉल से साभार